پی سی بی کا ہیڈ کوچ کے لیے مشاورتی عمل جاری، مائیک ہیسن مضبوط امیدوار قرار

پاکستان کرکٹ بورڈ (پی سی بی) نے قومی کرکٹ ٹیم کے نئے ہیڈ کوچ کی تقرری کے لیے مشاورتی عمل تیز کر دیا ہے اور ذرائع کے مطابق اس کا باقاعدہ اعلان 4 مئی کے بعد متوقع ہے۔ نیوزی لینڈ کے سابق کوچ اور اسلام آباد یونائیٹڈ کے موجودہ مینٹور مائیک ہیسن کو وائٹ بال (ون ڈے اور ٹی ٹوئنٹی) فارمیٹ کے لیے سب سے مضبوط امیدوار قرار دیا جا رہا ہے۔ پاکستان سپر لیگ میں کوچنگ کے تجربے کے باعث ہیسن کو ملکی کرکٹ ماحول سے واقف تصور کیا جا رہا ہے، جو ایک مثبت پہلو سمجھا جا رہا ہے۔

ذرائع کے مطابق اگر مائیک ہیسن کو ہیڈ کوچ مقرر کیا گیا، تو ان کی پہلی ذمہ داری 21 مئی سے شروع ہونے والی پاکستان بمقابلہ بنگلہ دیش ٹی ٹوئنٹی سیریز ہوگی، جس کے پانچ میچز میں سے تین لاہور اور دو فیصل آباد میں کھیلے جائیں گے۔ ممکنہ اسکواڈ میں صاحبزادہ فرحان، حسین طلعت، حسن علی، فہیم اشرف اور علی رضا جیسے کھلاڑیوں کی شمولیت زیر غور ہے۔