حساس گفتگو کے دوران ماڈلز خفیہ طور پر بدلنے پر اوپن اے آئی تنقید کی زد میں

اوپن اے آئی کو اپنے پریمیم صارفین کی شدید تنقید کا سامنا ہے، کیونکہ رپورٹس کے مطابق کمپنی حساس موضوعات پر صارفین کی گفتگو کو بغیر اطلاع دیے زیادہ سخت حفاظتی فلٹر والے ماڈلز پر منتقل کر دیتی ہے۔

گزشتہ ہفتے ریڈٹ اور دیگر فورمز پر صارفین کی شکایات کی بھرمار رہی۔ ان کا کہنا ہے کہ  جدید ماڈلز پر سبسکرپشن لینے کے باوجود گفتگو خاموشی سے کمزور یا محتاط ماڈلز پر بھیج دی جاتی ہے۔

یہ تبدیلی اوپن اے آئی کی نئی حفاظتی پالیسیوں کا حصہ ہے جو اس ماہ نافذ کی گئی ہیں۔ کمپنی کا کہنا ہے کہ یہ اقدامات ذمہ دارانہ رویے کو یقینی بنانے کے لیے ہیں۔ تاہم صارفین کا دعویٰ ہے کہ اس سے ان کی ادائیگی کا مقصد ہی فوت ہو جاتا ہے۔

اوپن اے آئی نے اس عمل کی تصدیق کی ہے اور کہا ہے کہ بعض سوالات سخت فلٹر والے متبادل ماڈلز پر بھیجے جاتے ہیں تاکہ اعتماد اور حفاظت برقرار رہے۔ لیکن صارفین کا کہنا ہے کہ شفافیت نہ ہونے اور فیچر بند کرنے کا کوئی اختیار نہ دینے سے ان کی ناراضگی میں اضافہ ہو رہا ہے۔