بھارتی سائبر پروپیگنڈے کے خلاف پی ٹی اے کا سخت ردعمل، 46 جعلی اکاؤنٹس بلاک کرنے کی سفارش

پاکستان اور بھارت کے درمیان کشیدگی میں اضافے کے بعد، پاکستان ٹیلی کمیونیکیشن اتھارٹی  نے بھارت کی پشت پناہی میں چلنے والی سوشل میڈیا مہم کے خلاف جامع کریک ڈاؤن شروع کر دیا ہے۔

ذرائع کے مطابق، درجنوں مشتبہ سوشل میڈیا اکاؤنٹس کی شناخت کی گئی ہے جو پاکستان مخالف بیانیہ پھیلانے میں ملوث تھے۔ پی ٹی اے نے تصدیق کی ہے کہ اب تک 46 مشتبہ یو آر ایل متعلقہ سوشل میڈیا پلیٹ فارمز کو بلاک کرنے کے لیے رپورٹ کیے جا چکے ہیں۔

پی ٹی اے نے سوشل میڈیا پر 24 گھنٹے نگرانی کا نظام فعال کر دیا ہے تاکہ کسی بھی جھوٹے اور منظم پروپیگنڈے کو فوری طور پر روکا جا سکے۔ پی ٹی اے حکام نے بتایا کہ یہ اکاؤنٹس حالیہ کشیدہ حالات کے بعد سرگرم ہو گئے تھے اور ایک مربوط حکمت عملی کے تحت پاکستان کے خلاف بیانیہ پھیلا رہے تھے۔

پی ٹی اے اور دیگر متعلقہ ادارے اس مہم کو روکنے کیلئے متحرک ہیں۔ عوام سے اپیل کی گئی ہے کہ مشکوک مواد کو فوری رپورٹ کریں اور غیر مصدقہ خبروں سے اجتناب کریں۔

یہ کارروائی پاکستان کی ڈیجیٹل خودمختاری کے تحفظ اور غلط معلومات کے خلاف دفاعی حکمت عملی کا حصہ قرار دی جا رہی ہے۔