کھیل
پی ایس بی نے ارشد ندیم کے کوچ سلمان بٹ پر عائد پابندی کو غیر قانونی قرار دے دیا
پاکستان اسپورٹس بورڈ (پی ایس بی) کے ایڈجیوکیٹر سینیٹر پرویز رشید نے ایتھلیٹکس فیڈریشن آف پاکستان کی جانب سے ارشد ندیم کے کوچ سلمان بٹ پر عائد پابندی کو غیر قانونی قرار دے دیا۔
یہ فیصلہ سینیٹر پرویز رشید کی زیر صدارت ہونے والی سماعت کے بعد سنایا گیا، جس میں دونوں فریقین نے اپنے اپنے دلائل پیش کیے۔
ایتھلیٹکس فیڈریشن کی جانب سے سلمان بٹ پر عائد پابندی کو کوچ نے پی ایس بی میں چیلنج کیا تھا۔ سماعت کے دوران ایتھلیٹکس فیڈریشن کے صدر وجاہت حسین بھی ایڈجیوکیٹر کے سامنے پیش ہوئے۔
تاہم فیڈریشن پابندی سے متعلق کوئی معقول اور ٹھوس جواز پیش نہ کرسکی، جس پر پی ایس بی ایڈجیوکیٹر نے پابندی کو غیر قانونی قرار دیتے ہوئے اسے کالعدم کر دیا۔
وفاقی حکومت اس سے قبل ہی فیڈریشن کے متنازع فیصلے کا نوٹس لے چکی تھی، خاص طور پر اس لیے کہ سلمان بٹ پاکستان کے اولمپک چیمپئن ارشد ندیم کے تربیت کار کے طور پر مرکزی کردار ادا کر رہے ہیں۔
پی ایس بی کے فیصلے کے بعد کوچ سلمان بٹ پر عائد پابندی ختم ہو گئی ہے، اور وہ دوبارہ اپنی پیشہ ورانہ ذمہ داریاں سرانجام دے سکیں گے۔