تجارت
پاکستان کے لیے 1.2 ارب ڈالر قرض کی منظوری، آئی ایم ایف ایگزیکٹو بورڈ کا اجلاس 8 دسمبر کو طلب
اسلام آباد: پاکستان کے لیے 1.2 ارب ڈالر قرض کی منظوری کے حوالے سے آئی ایم ایف کے ایگزیکٹو بورڈ کا اجلاس 8 دسمبر کو طلب کر لیا گیا ہے۔
تفصیلات کے مطابق، اجلاس میں پاکستان کے لیے ایکسٹینڈڈ فنڈ فسیلٹی کے تحت 1 ارب ڈالر اور کلائمیٹ فنانسنگ کی مد میں 20 کروڑ ڈالر کی قسط کی منظوری دی جائے گی۔
یہ اجلاس آئی ایم ایف کے ایگزیکٹو بورڈ کیلنڈر کے مطابق پاکستان اور صومالیہ کے اسٹاف لیول ایگریمنٹس کی منظوری کے لیے علیحدہ علیحدہ منعقد کیا جائے گا۔
ذرائع کے مطابق، اجلاس سے قبل پاکستان سے توقع کی جا رہی ہے کہ وہ گورننس اینڈ کرپشن ڈائیگنوسٹک رپورٹ جاری کرے گا، جو پروگرام کے کلیدی ساختی معیارات میں سے ایک ہے۔
یہ رپورٹ دراصل آئی ایم ایف کے تکنیکی مشن نے تیار کی ہے، جس نے رواں سال کے اوائل میں پاکستان کا دورہ کیا تھا اور سپریم کورٹ، وزارت قانون، آڈیٹر جنرل، ایف بی آر، نیب، پارلیمنٹ اور اسٹیٹ بینک کے نمائندوں سے ملاقاتیں کی تھیں۔
رپورٹ میں عوامی مالیاتی نظام کی خامیوں، ٹیکس نیٹ میں کمزوریوں، اور سرکاری افسران کے اثاثوں کی غیر شفاف تفصیلات پر شدید تحفظات ظاہر کیے گئے ہیں۔
مزید برآں، رپورٹ کے مطابق بدعنوانی، سیاسی اثر و رسوخ، اور ریگولیٹری اداروں کی کمزور نگرانی پاکستان کی گورننس کے بڑے مسائل ہیں، جنہوں نے معیشت کی کارکردگی پر منفی اثر ڈالا ہے۔