تجارت
ورلڈ بینک کا انتباہ: پاکستان میں مہنگائی میں اضافے کا خدشہ
ورلڈ بینک نے اپنی پاکستان ڈویلپمنٹ رپورٹ 2025 میں خبردار کیا ہے کہ حالیہ سیلابوں کے نتیجے میں پاکستان کی معیشت کو شدید نقصان پہنچا ہے اور اس کے باعث مہنگائی میں اضافہ متوقع ہے۔
رپورٹ کے مطابق رواں مالی سال کے دوران مہنگائی کی شرح 7.2 فیصد جبکہ آئندہ سال 6.8 فیصد رہنے کا امکان ہے۔ اسی طرح غربت کی شرح 21.5 فیصد تک رہنے کی پیشگوئی کی گئی ہے۔
ورلڈ بینک نے کہا کہ پاکستان کی معیشت میں کچھ بہتری ضرور آئی ہے اور شرح نمو 2025 میں 3 فیصد تک پہنچ گئی ہے جو گزشتہ سال 2.6 فیصد تھی، تاہم زرعی شعبے کی کمزوری اور برآمدات میں سست روی بدستور چیلنج ہیں۔
رپورٹ میں زور دیا گیا کہ صرف ٹیرِف اصلاحات کافی نہیں، حکومت کو نیشنل ٹیرِف پالیسی پر مکمل عملدرآمد یقینی بنانا ہوگا۔ اس کے ساتھ ساتھ ترسیلات زر میں اضافہ بھی ضروری ہے تاکہ تجارتی خسارہ کم کیا جا سکے۔
ورلڈ بینک کے مطابق پاکستان میں ہر سال 16 لاکھ نوجوان روزگار کی منڈی میں داخل ہوتے ہیں، لہٰذا معیشت کی تیز رفتار ترقی، نجی سرمایہ کاری اور روزگار کے نئے مواقع پیدا کرنا ناگزیر ہے۔
رپورٹ میں حکومت کو ٹیکس نیٹ بڑھانے، سرکاری شعبے میں اصلاحات، نجکاری کے عمل کو تیز کرنے اور کاروبار دوست ماحول بنانے کی ہدایت کی گئی ہے تاکہ غربت کم ہو اور عوامی معیارِ زندگی بہتر ہو۔