زرعی و صنعتی صارفین کے لیے بجلی 14 روپے فی یونٹ تک سستی ہونے کا امکان

حکومت کی جانب سے زرعی اور صنعتی صارفین کے لیے طویل المدتی ریلیف پیکیج تیار کیا گیا ہے، جس کے تحت بجلی کے نرخوں میں نمایاں کمی کا امکان ہے۔

ذرائع کے مطابق پاور ڈویژن نے تین سالہ پیکیج تیار کرلیا ہے جس کے تحت بجلی کی فی یونٹ قیمت میں 14 روپے تک کمی متوقع ہے۔ اس پیکیج کے بعد زرعی اور صنعتی صارفین کے لیے بجلی کی قیمت 22 سے 23 روپے 50 پیسے فی یونٹ تک مقرر کیے جانے کا امکان ہے۔

اس وقت زرعی صارفین 38 روپے جبکہ صنعتی صارفین 34 روپے فی یونٹ کے حساب سے ادائیگی کر رہے ہیں۔ نئی اسکیم کے تحت اضافی استعمال پر بھی رعایتی نرخ لاگو ہوں گے۔

ذرائع کا کہنا ہے کہ پاور ڈویژن یہ پیکیج منظوری کے لیے وزیراعظم کو پیش کرے گی، اور توقع ہے کہ وزیراعظم شہباز شریف آئندہ چند روز میں اس ریلیف پیکیج کا باضابطہ اعلان کریں گے۔

یہ فیصلہ حکومت کی جانب سے توانائی لاگت کم کرنے، پیداوار بڑھانے اور ملکی برآمدات میں بہتری لانے کے لیے اہم پیش رفت تصور کیا جا رہا ہے۔