خیبرپختونخوا میں دریائے سندھ و کابل سے سونا نکالنے پر پابندی میں 30 روز کی توسیع

خیبرپختونخوا حکومت نے صوبے میں دریائے سندھ اور دریائے کابل کے کناروں سے غیر قانونی طور پر سونا نکالنے پر عائد پابندی میں مزید 30 دن کی توسیع کر دی ہے۔ یہ پابندی ضابطہ فوجداری کی دفعہ 144 کے تحت لگائی گئی ہے۔

حکومتی اعلامیے کے مطابق پابندی خاص طور پر صوابی، نوشہرہ، کوہاٹ اور قریبی علاقوں میں لاگو ہوگی۔ حکام کا کہنا ہے کہ غیر قانونی سونا نکالنے سے نہ صرف دریاؤں کے کنارے تباہ ہو رہے ہیں بلکہ پانی کے ذخائر آلودہ ہونے اور عوامی صحت کو خطرات لاحق ہیں۔

اعلامیے میں کہا گیا ہے کہ غیر قانونی سرگرمیوں سے مقامی تنازعات اور اسمگلنگ جیسے مسائل بھی جنم لے رہے ہیں۔ ضلعی انتظامیہ اور پولیس کو ہدایت دی گئی ہے کہ غیر قانونی سونا نکالنے والوں کے خلاف قانونی کارروائی کرتے ہوئے ان کی مشینری اور گاڑیاں ضبط کی جائیں۔

دوسری جانب نیب خیبرپختونخوا نے سونا نکالنے کے ٹھیکوں میں اربوں روپے کی مبینہ خردبرد کی تحقیقات شروع کر دی ہیں۔ نیب ذرائع کے مطابق بعض ٹھیکے اصل مالیت سے کم رقم پر دیے گئے تھے۔ ندی نالوں سے سونا نکالنے کا ایک ٹھیکہ 6 ارب روپے کے بجائے 4 ارب روپے میں دیا گیا۔

ذرائع کے مطابق صوابی، کوہاٹ، کوہستان اور نظامپور سمیت مختلف علاقوں سے غیر قانونی طور پر سونا نکالا جا رہا ہے، جس کے ریکارڈ کو نیب نے ضبط کر لیا ہے۔