ایف بی آر کا بڑا اقدام: سوشل میڈیا پر دولت کی نمائش کرنے والے افراد کے گرد گھیرا تنگ

فیڈرل بورڈ آف ریونیو  نے سوشل میڈیا پر اپنی پرتعیش زندگی کا مظاہرہ کرنے والے افراد کے خلاف بڑا کریک ڈاؤن شروع کر دیا ہے۔ ایف بی آر کے مطابق، ایسی 1 لاکھ شخصیات کی نشاندہی کی گئی ہے جو سوشل میڈیا پر قیمتی گاڑیوں، عالیشان بنگلوں، زیورات، اور پرتعیش شادیوں کی ویڈیوز و تصاویر شیئر کر رہی ہیں۔

حکام کا کہنا ہے کہ کئی افراد کو شادیوں پر 20,000 ڈالر کے مہنگے سوٹ پہنے ہوئے دیکھا گیا ہے، جو ان کی آمدن سے مطابقت نہیں رکھتا۔ ایف بی آر کے مطابق ان مظاہروں کو ٹیکس ریٹرنز سے ملایا جائے گا تاکہ اصل آمدن کا اندازہ لگایا جا سکے۔

ذرائع کے مطابق، ایف بی آر نے سوشل میڈیا پر ایک خصوصی ٹیم تعینات کی ہے جس نے یہ ڈیٹا اکھٹا کیا ہے۔ گزشتہ اور موجودہ سال کے ٹیکس ریٹرنز کا تقابلی جائزہ لیا جائے گا اور تقریباً 80 فیصد ریٹرنز کا آڈٹ کیا جائے گا۔

ایف بی آر نے خبردار کیا ہے کہ جو لوگ اپنی آمدن اور اخراجات کو درست طور پر ظاہر کریں گے ان کے خلاف کوئی کارروائی نہیں ہوگی، لیکن جو افراد غلط بیانی کریں گے انہیں قانونی کارروائی کا سامنا کرنا پڑے گا۔