آئی ایم ایف کا مشروط ریلیف: پنشنرز پر ٹیکس لگانے کی تجویز پر غور

آنے والے وفاقی بجٹ 2025-26 سے قبل ایک اہم پیشرفت سامنے آئی ہے، جس میں آئی ایم ایف نے حکومت پاکستان کو تنخواہ دار طبقے کو ریلیف دینے کی مشروط اجازت دے دی ہے۔ تاہم یہ ریلیف اسی صورت ممکن ہے جب حکومت دیگر ذرائع سے آمدن حاصل کرے — جن میں ایک متنازع تجویز پنشنرز پر ٹیکس عائد کرنا بھی شامل ہے۔

معاشی تجزیہ کار شہباز رانا نے سما ٹی وی کے پروگرام “ریڈ لائن ود طلعت” میں گفتگو کرتے ہوئے بتایا کہ وزیر اعظم شہباز شریف اور وزیر خزانہ محمد اورنگزیب تنخواہ دار طبقے کے مسائل سے آگاہ ہیں اور انہیں ریلیف دینے کی کوشش میں مصروف ہیں۔

گزشتہ 10 ماہ میں اس طبقے نے 437 ارب روپے انکم ٹیکس کی مد میں ادا کیے ہیں۔ حکومت ممکنہ طور پر سرکاری ملازمین کی تنخواہوں میں 10 فیصد اضافے کے ساتھ ٹیکس میں کچھ نرمی پر غور کر رہی ہے، تاہم حتمی فیصلے تاحال زیر بحث ہیں۔

آئی ایم ایف کو دفاعی بجٹ پر اعتراض نہیں، لیکن وہ اس بات پر زور دے رہا ہے کہ ہر خرچے کا مالی بندوبست کیا جائے۔ شہباز رانا کے مطابق، پاکستان اس وقت تقریباً 50 سخت شرائط کے ساتھ آئی ایم ایف سے مذاکرات کر رہا ہے، جن میں کئی بجٹ سے متعلق اور ساختی اصلاحات سے متعلق ہیں۔