کراچی کی اردو کانفرنس بشریٰ انصاری کی نشست کے ساتھ اختتام پذیر

کراچی آرٹس کونسل میں 17ویں بین الاقوامی اردو کانفرنس کے آخری روز مشہور اداکارہ بشریٰ انصاری کی موجودگی نے تقریب کو یادگار بنا دیا۔ عمران اشرف نے اس خصوصی نشست کی میزبانی کی، جس میں بشریٰ انصاری کی زندگی، اردو زبان سے تعلق، اور فنی سفر پر گفتگو کی گئی۔

بشریٰ انصاری نے اپنی کہانی سناتے ہوئے بتایا کہ وہ لاہور سے تعلق رکھتی ہیں اور کراچی میں کام کے لیے آئی تھیں۔ انہوں نے کہا، “اردو روانی سے بولتی ہوں، اس لیے لوگ سمجھتے ہیں کہ میرا تعلق کراچی سے ہے، لیکن اصل میں میں لاہور کی ہوں۔”

آرٹس کونسل کے صدر محمد احمد شاہ نے بشریٰ انصاری کو “ایک مکمل ادارہ” قرار دیا اور ان کے فن اور اردو کے فروغ کے لیے خدمات کو سراہا۔ عمران اشرف نے اس موقع کو اعزاز قرار دیتے ہوئے کہا کہ بشریٰ انصاری جیسی شخصیت کے ساتھ یہ وقت گزارنا یادگار رہا۔

تقریب میں موسیقار اظہر حسین کی صلاحیتوں کی بھی تعریف کی گئی، جنہیں بشریٰ انصاری آٹھویں جماعت سے جانتی ہیں۔ یہ نشست اردو زبان اور اس کے فروغ کے لیے وقف شخصیات کو خراجِ تحسین پیش کرنے کا ایک بہترین لمحہ تھا۔