کراچی میں 25 مئی سے شدید گرمی کی لہر، درجہ حرارت 40 ڈگری تک جانے کا امکان

محکمہ موسمیات نے کراچی اور جنوبی سندھ کے لیے شدید گرمی کی لہر کی وارننگ جاری کر دی ہے جو 25 مئی سے شروع ہوگی۔ بحیرہ عرب میں بننے والے کم دباؤ کے نظام کی وجہ سے درجہ حرارت میں خطرناک حد تک اضافہ متوقع ہے۔

ڈی جی محکمہ موسمیات انجم رضوی کے مطابق کراچی میں درجہ حرارت 40 ڈگری سینٹی گریڈ تک جا سکتا ہے اور محسوس ہونے والی گرمی اس سے 3 سے 4 ڈگری زیادہ ہو سکتی ہے۔ شہریوں کو ہدایت کی گئی ہے کہ وہ دھوپ سے بچیں، پانی کا زیادہ استعمال کریں اور دوپہر کے وقت باہر نہ نکلیں۔

یہ گرمی کی لہر ٹھٹھہ، بدین، اور حیدرآباد سمیت دیگر جنوبی اضلاع کو بھی متاثر کرے گی۔ اگرچہ ساحلی علاقوں میں نظام کا براہ راست اثر نہیں ہوگا، تاہم کراچی سمیت ساحلی پٹی پر بھی شدید گرمی محسوس کی جائے گی۔

محکمہ موسمیات نے شہریوں کو محفوظ رہنے اور صورتحال سے باخبر رہنے کی تلقین کی ہے۔