وزیراعظم شہباز شریف اور وزیراعلیٰ پنجاب مریم نواز کا سیلاب متاثرہ علاقوں کا دورہ

وزیراعظم شہباز شریف وزیراعلیٰ پنجاب مریم نواز کے ہمراہ سیلاب سے متاثرہ علاقوں کے دورے پر روانہ ہو گئے۔ روانگی سے قبل وزیراعظم کو چیئرمین این ڈی ایم اے لیفٹیننٹ جنرل انعام حیدر نے دریاؤں میں طغیانی، زیرِ آب علاقوں اور جاری ریسکیو و ریلیف آپریشنز پر تفصیلی بریفنگ دی۔

فضائی جائزے کے دوران وزیراعظم نے متعلقہ اداروں کو ہدایت دی کہ سیلابی صورتحال سے نمٹنے کے لیے تمام ضروری اقدامات فوری طور پر کیے جائیں تاکہ متاثرین کو بروقت امداد پہنچ سکے۔

وزیراعلیٰ پنجاب مریم نواز شریف بھی وزیراعظم کے ہمراہ لاہور سے نارووال روانہ ہوئیں۔ دورانِ سفر دونوں رہنماؤں کے درمیان سیلابی صورتحال اور ریلیف اقدامات پر گفتگو ہوئی جبکہ چیئرمین این ڈی ایم اے مسلسل بریفنگ دیتے رہے۔

نارووال پہنچنے پر وزیراعظم اور وزیراعلیٰ کو متاثرہ علاقوں، متاثرین کی امداد، بحالی کے اقدامات اور آئندہ کے لائحہ عمل پر مزید تفصیلی بریفنگ دی جائے گی۔