مدھیہ پردیش اسپتال میں جعلی ڈاکٹر کی سرجری، سات مریضوں کی ہلاکت

مدھیہ پردیش کے شہر دموہ کے ایک اسپتال میں جعلی ڈاکٹر کی دل کی سرجری کے دوران سات مریضوں کی ہلاکت کا واقعہ سامنے آیا ہے۔ جعلی ڈاکٹر “جان کیم” کے نام سے اسپتال میں کام کر رہا تھا اور خود کو مشہور ماہر امراض قلب ظاہر کرتا تھا۔ اس نے دل کے مریضوں کی سرجری کی، جس کے بعد وہ موت کے منہ میں چلے گئے۔

یہ معاملہ اس وقت سامنے آیا جب ان اموات نے علاقے میں خطرے کی گھنٹی بجا دی، اور اسپتال انتظامیہ نے تحقیقات شروع کی۔ ابتدائی تحقیقات میں یہ انکشاف ہوا کہ “جان کیم” کا اصل نام نریندر وکرمادتیہ یادو ہے اور اس نے جعلی دستاویزات پیش کی تھیں۔

میڈیا رپورٹس کے مطابق ضلعی تفتیشی ٹیم نے اسپتال سے تمام دستاویزات ضبط کرلی ہیں اور یہ معلوم ہوا ہے کہ ملزم نے مشہور برطانوی ڈاکٹر کی دستاویزات کی نقل پیش کی تھی۔ اس کے علاوہ ملزم پر حیدرآباد میں ایک فوجداری مقدمہ درج ہونے کے ساتھ ساتھ متعدد تنازعات میں ملوث ہونے کا الزام بھی ہے۔

ایک وکیل اور چائلڈ ویلفیئر کمیٹی کے ضلعی صدر دیپک تیواری نے دعویٰ کیا ہے کہ سرکاری طور پر سات افراد کی موت کی تصدیق کی گئی ہے، مگر اصل تعداد اس سے کہیں زیادہ ہو سکتی ہے اور اس سلسلے میں وہ عدالت میں شکایت درج کروا چکے ہیں۔

یہ واقعہ میڈیکل فراڈ کے خطرات کو اجاگر کرتا ہے اور اسپتالوں میں مریضوں کی حفاظت کو یقینی بنانے کے لیے سخت چیک اینڈ بیلنس کی ضرورت کو واضح کرتا ہے۔