ضم اضلاع میں امن کے قیام کے لیے اعلیٰ حکومتی وفد کا میران شاہ اور بنوں کا دورہ

وزیراعلیٰ خیبر پختونخوا علی امین گنڈاپور کی خصوصی ہدایت پر مشیر اطلاعات بیرسٹر ڈاکٹر سیف کی سربراہی میں اعلیٰ سطحی حکومتی وفد نے میران شاہ اور بنوں کا دورہ کیا تاکہ علاقے کی مجموعی سیکورٹی صورتحال کا جائزہ لیا جا سکے اور عوامی مسائل براہ راست سنے جا سکیں۔

وفد میں چیف سیکرٹری خیبرپختونخوا شہاب علی شاہ، آئی جی پولیس ذوالفقار حمید، صوبائی وزیر پختون یار اور دیگر اعلیٰ افسران شامل تھے۔ دورے کے دوران سیکیورٹی اداروں نے شمالی وزیرستان اور ملحقہ علاقوں کی صورتحال پر تفصیلی بریفنگ دی، جبکہ یادگار شہداء پر حاضری دی گئی اور شہداء کے بلند درجات کے لیے فاتحہ خوانی کی گئی۔

اس موقع پر قبائلی عمائدین کے ساتھ خصوصی ملاقاتیں ہوئیں جن میں علاقے کے امن و امان اور ترقیاتی منصوبوں پر تبادلہ خیال کیا گیا۔ بیرسٹر سیف نے کہا کہ قبائلی عوام کا امن کے قیام میں اہم کردار ہے اور ان کی شراکت داری سے ہی پائیدار امن ممکن ہے۔

بعدازاں وفد نے بنوں کا دورہ کیا جہاں مقامی مشران سے ملاقاتیں کی گئیں۔ جرگہ میں سابق سینیٹر باز محمد، ایم پی اے عدنان خان اور دیگر شامل تھے۔ وفد کو عوامی مسائل، سیکیورٹی، تعلیم، صحت اور دیگر شعبوں سے متعلق بریفنگ دی گئی۔

بیرسٹر سیف نے اس بات کا اعادہ کیا کہ ضم اضلاع کو دیگر اضلاع کے برابر لانا حکومت کی اولین ترجیح ہے اور اس مقصد کے لیے بھاری فنڈز مختص کیے گئے ہیں۔ وفد کے مشاہدات اور سفارشات پر مشتمل رپورٹ وزیراعلیٰ کو پیش کی جائے گی۔