دلائی لاما کے تناسخ پر بھارتی بیان، چین کا شدید ردعمل: “یہ ہمارا اندرونی معاملہ ہے”

چین نے بھارت کے ایک سرکاری اہلکار کی جانب سے دلائی لاما کے تناسخ سے متعلق دیے گئے بیان پر شدید ردعمل ظاہر کرتے ہوئے کہا ہے کہ یہ معاملہ مکمل طور پر چین کا اندرونی معاملہ ہے۔

بھارت میں تعینات چینی سفیر شو فیہونگ نے سوشل میڈیا پر بیان جاری کرتے ہوئے کہا کہ تبت (ژیزانگ) چین کا ناقابلِ تقسیم حصہ ہے اور تبتی بدھ مت چین کی سرزمین، خاص طور پر چنگھائی-تبت کے پہاڑی علاقے میں پروان چڑھا ہے۔

ان کا کہنا تھا کہ دلائی لاما سمیت کسی بھی مذہبی شخصیت کو مذہبی عہدہ دینا صرف چینی مرکزی حکومت کا اختیار ہے اور کسی بھی غیر ملکی تنظیم یا فرد کو اس عمل میں مداخلت یا اثر انداز ہونے کی اجازت نہیں دی جائے گی۔

چینی سفیر نے مزید کہا کہ چین زندہ بدھاؤں کے تناسخ کے عمل کو ملکی قوانین کے مطابق کنٹرول کرتا ہے اور مذہبی خودمختاری کے اصولوں پر سختی سے کاربند ہے۔

یہ بیان ایک بار پھر چین اور بھارت کے درمیان تبت اور دلائی لاما کے حساس مسئلے پر جاری کشیدگی کو اجاگر کرتا ہے، جہاں دونوں ممالک کی نظریاتی اور جغرافیائی کشمکش واضح ہوتی جا رہی ہے۔