حماس نے ایک اور اسرائیلی یرغمالی کی لاش ریڈ کراس کے حوالے کردی

فلسطینی تنظیم حماس نے ایک اور اسرائیلی یرغمالی کی لاش بین الاقوامی ریڈ کراس کے نمائندوں کے حوالے کردی ہے۔ رپورٹ کے مطابق لاش غزہ سے وصول کر کے اسرائیلی حکام کے حوالے کر دی گئی۔

اسرائیلی فوج کے مطابق لاش کو پولیس کی نگرانی میں تل ابیب کے ابو کبیر فرانزک انسٹی ٹیوٹ منتقل کیا گیا ہے، جہاں اس کی شناخت کا عمل دو دن تک جاری رہنے کا امکان ہے۔

اسرائیلی میڈیا کے مطابق حماس اب تک 13 یرغمالیوں کی لاشیں واپس کر چکی ہے، جب کہ تنظیم کے پاس مزید 15 لاشیں موجود ہیں۔ اسرائیلی حکام نے حماس سے مطالبہ کیا ہے کہ وہ باقی لاشیں بھی جلد از جلد واپس کرے۔

غیر ملکی میڈیا کی حالیہ رپورٹس میں دعویٰ کیا گیا ہے کہ حماس کی قید میں موجود متعدد یرغمالی ممکنہ طور پر اسرائیلی فضائی حملوں میں ہلاک ہوئے۔

یہ پیشرفت ایسے وقت میں سامنے آئی ہے جب غزہ میں انسانی بحران شدت اختیار کر رہا ہے اور عالمی سطح پر دونوں فریقوں سے سیزفائر اور انسانی بنیادوں پر اقدامات کا مطالبہ زور پکڑ رہا ہے۔