جعلی دستاویزات پر ویزا حاصل کرنے کی کوشش، امریکی قونصل خانے کے باہر شخص گرفتار

اینٹی ہیومن ٹریفکنگ سرکل نے امریکی قونصل خانے کے باہر ایک اہم کارروائی کے دوران محمد ابراہیم نامی شخص کو گرفتار کر لیا، جو مبینہ طور پر جعلی دستاویزات کے ذریعے امریکی ویزا حاصل کرنے کی کوشش کر رہا تھا۔

سرکاری ذرائع کے مطابق، ملزم نے ویزا اپلائی کرنے کے دوران جعلی میڈیکل رپورٹس اور وزارت خارجہ کے جعلی تصدیقی خطوط پیش کیے۔ یہ کاروائی امریکی قونصل خانے کی شکایت پر عمل میں لائی گئی۔

حکام نے بتایا کہ ملزم نے مختلف جعلی کاغذات، بشمول فرضی میڈیکل رپورٹس اور دیگر سرٹیفکیٹس، جمع کروائے تاکہ قونصل خانے کے عملے کو دھوکہ دے کر ویزا حاصل کیا جا سکے۔

ملزم کو حراست میں لے لیا گیا ہے اور مزید تحقیقات جاری ہیں تاکہ اس فراڈ کے پیچھے کسی نیٹ ورک یا دیگر شریک ملزمان کا سراغ لگایا جا سکے۔

قانون نافذ کرنے والے اداروں نے واضح کیا ہے کہ ویزا فراڈ اور انسانی اسمگلنگ جیسے جرائم پر سخت کارروائی جاری رکھی جائے گی اور کسی کو بھی قانون ہاتھ میں لینے کی اجازت نہیں دی جائے گی۔