بھارتی فضائیہ کا طیارہ میانمار میں GPS سپوفنگ حملے کا شکار، آپریشن برہما متاثر نہ ہوا

دفاعی ذرائع کے مطابق، بھارتی فضائیہ کے  سپر ہرکولیس طیارے پر اُس وقت سپوفنگ کا حملہ کیا گیا جب وہ میانمار کی فضائی حدود میں زلزلہ متاثرین کے لیے امدادی سامان لے جا رہا تھا۔ یہ واقعہ “آپریشن برہما” کے دوران پیش آیا، جو بھارت کی جانب سے زلزلے کے بعد شروع کیا گیا ایک انسانی ہمدردی کا مشن ہے۔

حملے میں طیارے کے نیویگیشن سسٹم کو جعلی  سگنلز سے گمراہ کرنے کی کوشش کی گئی، تاہم تربیت یافتہ پائلٹس نے فوری طور پر اندرونی نیویگیشن سسٹم  پر منتقل ہو کر طیارے کو محفوظ طریقے سے منزل تک پہنچا دیا۔

ماہرین کے مطابق، GPS سپوفنگ ایک جدید سائبر حملہ ہے جو نیویگیشن کو متاثر کر کے طیارے یا بحری جہاز کو غلط سمت میں لے جا سکتا ہے۔ نومبر 2023 سے امرتسر اور جموں کے علاقوں میں بھی ایسے 465 واقعات رپورٹ ہو چکے ہیں۔

میانمار میں 28 مارچ کو آنے والے 7.7 شدت کے زلزلے میں 3,649 افراد جاں بحق اور 5,000 سے زائد زخمی ہوئے۔ بھارت نے فوری طور پر “آپریشن برہما” کے ذریعے امداد فراہم کرنا شروع کی، جس میں ریسکیو، طبی سہولیات، اور بنیادی ضروریات کی فراہمی شامل ہے۔

تاہم، فوجی حکومت کی جانب سے انٹرنیٹ پر پابندیاں، خراب موسم، اور سیکیورٹی خطرات اس مشن میں چیلنج بنے ہوئے ہیں۔ اتوار کو ایک اور زلزلہ 5.6 شدت کا ریکارڈ کیا گیا، تاہم اس میں کسی جانی یا مالی نقصان کی اطلاع نہیں ملی۔