اسلام آباد میں باجوں کی خرید وفروخت پر پابندی لگ گئی

یومِ آزادی کی آمد کے پیشِ نظر، اسلام آباد کی ضلعی انتظامیہ نے شہر بھر میں باجوں (پلاسٹک باجا، ووزیلا) کی خرید و فروخت اور استعمال پر پابندی عائد کر دی ہے تاکہ عوامی سکون اور نظم و ضبط کو برقرار رکھا جا سکے۔

ڈپٹی کمشنر اسلام آباد نے تمام فیلڈ افسران کو حکم دیا ہے کہ وہ فوری طور پر کارروائی شروع کریں اور بازاروں میں لگے اسٹالز سے باجے ضبط کریں۔ یہ بھی ہدایت کی گئی ہے کہ روزانہ کی بنیاد پر چیکنگ اور کارروائی جاری رکھی جائے۔

انتظامیہ کا کہنا ہے کہ 14 اگست کی تقریبات میں باجوں کا حد سے زیادہ استعمال بزرگوں، مریضوں اور عوام کے لیے اذیت کا باعث بنتا ہے، جس کی روک تھام ضروری ہے۔

خلاف ورزی کرنے والے دکانداروں اور افراد کے خلاف قانونی کارروائی ہوگی، جن میں جرمانہ اور سامان کی ضبطی شامل ہے۔

یہ پابندی 14 اگست تک جاری رہے گی، اور شہر بھر میں نگرانی سخت کر دی گئی ہے۔