ورلڈ بینک کا پاکستان کیلئے 108 ملین ڈالر کا اضافی پیکیج منظور، دیہی رابطوں اور پائیدار سیاحت کو فروغ ملے گا

پاکستان کی ترقیاتی حکمت عملی کو فروغ دینے کے لیے ورلڈ بینک نے 108 ملین ڈالر کی اضافی مالی معاونت کی منظوری دے دی ہے۔ یہ رقم پنجاب میں دیہی علاقوں کی سڑکوں کی بہتری اور خیبر پختونخوا میں پائیدار سیاحت کے فروغ پر خرچ کی جائے گی۔

بین الاقوامی مالیاتی ادارے کے بیان کے مطابق، 78 ملین ڈالر پنجاب رورل ایکسیسبلٹی پراجیکٹ کیلئے مختص کیے گئے ہیں، جس کا مقصد دیہی سڑکوں کو بہتر بنانا، منڈیوں تک رسائی کو سہل بنانا، اور روزگار کے مواقع پیدا کرنا ہے۔

باقی 30 ملین ڈالر خیبر پختونخوا انٹیگریٹڈ ٹورازم ڈیولپمنٹ پراجیکٹ کے لیے وقف کیے گئے ہیں، جو ماحولیاتی استحکام، قدرتی وسائل کی بہتری، اور کمیونٹی پر مبنی ترقیاتی منصوبوں کو فروغ دے گا۔

ورلڈ بینک نے کہا کہ یہ سرمایہ کاری خاص طور پر پسماندہ اور کمزور طبقات میں بہتر سہولیات کی فراہمی اور معاشی مواقع پیدا کرنے کیلئے کی جا رہی ہے۔

یہ فنڈنگ ورلڈ بینک اور پاکستان کے درمیان جاری مالی تعاون کا تسلسل ہے، جو ملک کو اقتصادی چیلنجز سے نکالنے اور ترقیاتی اہداف کے حصول میں مدد فراہم کرے گا۔

وزارت منصوبہ بندی کے حکام نے اس اقدام کو خوش آئند قرار دیتے ہوئے کہا کہ یہ ترقی کے جامع سفر میں ایک اہم پیش رفت ہے۔