ضلع مردان میں ڈینگی کیسز تیزی سے بڑھنے لگے

ضلع مردان میں ڈینگی کے کیسز میں تیزی سے اضافہ ہورہا ہے۔ محکمہ صحت کے مطابق اب تک ڈینگی مچھر کے وار سے 31 افراد متاثر ہوچکے ہیں جبکہ مزید درجنوں مریض زیرِ تشخیص ہیں۔ خدشہ ظاہر کیا جا رہا ہے کہ آئندہ دنوں میں یہ وبا مزید پھیل سکتی ہے۔

ماہرین صحت کا کہنا ہے کہ صبح اور شام کے اوقات میں مچھر کے کاٹنے کا خطرہ سب سے زیادہ ہوتا ہے، اس لیے عوام حفاظتی تدابیر ضرور اختیار کریں۔ انہوں نے ہدایت کی ہے کہ گھروں اور محلوں میں پانی کھڑا نہ ہونے دیں، پانی کو ہمیشہ ڈھانپ کر رکھیں اور مچھر دانی یا ریپیلنٹ کا استعمال کریں۔

محکمہ صحت نے عوام سے اپیل کی ہے کہ احتیاطی تدابیر پر سختی سے عمل کریں تاکہ ڈینگی کے بڑھتے خطرات پر قابو پایا جا سکے۔