خلیل الرحمٰن قمر کو نازیبا ویڈیو وائرل کرنے کی دھمکی، ڈیڑھ کروڑ روپے تاوان کا مطالبہ

لاہور میں معروف ڈرامہ نویس و ہدایتکار خلیل الرحمٰن قمر کو ایک نامعلوم شخص کی جانب سے نازیبا ویڈیو وائرل کرنے کی دھمکی دیتے ہوئے ڈیڑھ کروڑ روپے تاوان کا مطالبہ کیا گیا ہے۔

ذرائع کے مطابق خلیل الرحمٰن قمر نے بتایا کہ وہ اپنے گھر پر موجود تھے جب ایک نامعلوم کالر نے انہیں فون کر کے تاوان کے لیے سنگین دھمکیاں دیں۔
کالر نے متعدد بار کالز اور پیغامات کے ذریعے مطالبہ کیا کہ اگر رقم ادا نہ کی گئی تو آمنہ عروج کی نازیبا ویڈیو وائرل کر دی جائے گی۔

خلیل الرحمٰن قمر کے مطابق انہیں گزشتہ کئی روز سے بھتہ خوری کی کالز اور میسجز موصول ہو رہے ہیں، جن میں سنگین نتائج کی دھمکیاں دی جا رہی ہیں۔

دوسری جانب ڈی آئی جی آپریشنز لاہور محمد فیصل کامران نے واقعے کا نوٹس لیتے ہوئے فوری طور پر تحقیقات کے لیے ایک خصوصی ٹیم تشکیل دے دی ہے۔
پولیس حکام کا کہنا ہے کہ ملزم کو جلد گرفتار کیا جائے گا اور واقعے کی مکمل چھان بین جاری ہے۔