تجارت
جرمنی کا پاکستان کے لیے 11 کروڑ 40 لاکھ یورو کا ترقیاتی پیکیج کا اعلان
پاکستان اور جرمنی کے درمیان 2025 کے دو طرفہ ترقیاتی تعاون سے متعلق مذاکرات اسلام آباد میں کامیابی کے ساتھ مکمل ہوگئے، جس کے بعد جرمنی نے 114 ملین یورو (تقریباً 35 ارب روپے) مالیت کے ترقیاتی پیکیج کا اعلان کیا۔
یہ پیکیج قابلِ تجدید توانائی، ماحولیاتی تحفظ، پائیدار اقتصادی ترقی، فنی و پیشہ ورانہ تربیت، اور سماجی تحفظ کے منصوبوں پر خرچ کیا جائے گا۔
مذاکرات کی مشترکہ صدارت سیکرٹری اقتصادی امور محمد حمیر کریم اور وفاقی وزارت برائے اقتصادی تعاون و ترقیکی ڈائریکٹر جنرل کرسٹین ٹوئٹسکے نے کی۔ اس موقع پر جرمنی کی سفیر اینا لیپل اور پاکستان کی سفیر برائے جرمنی ثقلین سیدہ بھی موجود تھیں۔
سیکرٹری اقتصادی امور محمد حمیر کریم نے جرمنی کی حکومت کا شکریہ ادا کرتے ہوئے کہا کہ جرمنی کا تعاون پاکستان کے ترقیاتی سفر اور “اُڑان پاکستان” پروگرام کے اہداف سے ہم آہنگ ہے۔ انہوں نے توانائی، روزگار اور سماجی تحفظ کے شعبوں میں جرمنی کے کردار کو سراہا۔
کرسٹین ٹوئٹسکے نے پاکستان کی اصلاحاتی کوششوں کی تعریف کرتے ہوئے کہا کہ جرمنی پاکستان کے ساتھ ماحولیاتی تبدیلی، اقتصادی استحکام اور سماجی شمولیت کے چیلنجز سے نمٹنے میں بھرپور تعاون جاری رکھے گا۔
جرمنی کی سفیر اینا لیپل نے کہا کہ دونوں ممالک کے درمیان دیرینہ تعلقات باہمی اعتماد اور ترقی پر مبنی ہیں، اور جرمنی پائیدار ترقی، اچھی حکمرانی اور عوامی فلاح کے لیے پاکستان کے ساتھ تعاون کو مزید فروغ دے گا۔
تقریب کے اختتام پر، دونوں ممالک کے نمائندوں نے پاکستان-جرمنی ترقیاتی تعاون مذاکرات 2025 کی دستاویز پر دستخط کیے، جس سے نئی مالی معاونت کی باضابطہ توثیق ہوئی۔ مذاکرات کا اگلا دور 2027 میں برلن میں منعقد ہوگا۔