شاہین آفریدی کا بگ بیش میں بابر، وارنر اور اسمتھ کو آؤٹ کرنے کا خواب

پاکستان کے فاسٹ باؤلر شاہین شاہ آفریدی نے آسٹریلیا میں ہونے والی بگ بیش لیگ کے لیے دلچسپ منصوبہ بندی کر لی ہے۔ انہوں نے اعلان کیا ہے کہ وہ بابر اعظم، اسٹیو اسمتھ اور ڈیوڈ وارنر کو آؤٹ کرنے کے لیے پرجوش ہیں۔

ایک پوڈکاسٹ انٹرویو میں شاہین نے کہا: “میرے لیے تینوں اہم ہیں، ان میں سے کسی ایک کو بھی الگ نہیں کر سکتا۔ یہ سبھی اپنی ٹیموں کے مرکزی کھلاڑی ہیں۔”

شاہین اس سیزن میں برسبین ہیٹ کی نمائندگی کریں گے۔ انہوں نے مزید کہا کہ اس بار بگ بیش لیگ میں چھ سے سات پاکستانی کھلاڑی شامل ہوں گے جس سے مقابلہ مزید دلچسپ ہوگا۔

“ہم پی ایس ایل میں ایک ساتھ کھیلے، اور اب ایک دوسرے کے خلاف ہوں گے۔ بابر، رضوان اور شاداب جیسے کھلاڑیوں کا سامنا کرنا ایک بڑا چیلنج ہے۔”

شاہین نے یہ بھی کہا کہ آسٹریلیا میں موجود پاکستانی شائقین کو یہ مقابلے خوب محظوظ کریں گے۔ “اگر شائقین میرے لیے نعرے لگائیں، خاص طور پر جب میں رن اپ پر ہوں، تو وہ لمحہ میرے لیے بہت خاص ہوگا۔”

بابر اعظم کے بارے میں شاہین نے کہا: “بابر دنیا کے سب سے مستقل بلے بازوں میں سے ایک ہیں۔ ان کے خلاف کھیلنا اور انہیں آؤٹ کرنا بلاشبہ ایک خاص احساس ہوگا۔”