بابراعظم کے ٹیم سے اخراج پر والد کا سخت ردعمل، ناقدین کو آئینہ دکھا دیا

پاکستان کے سابق کپتان بابراعظم کو نیوزی لینڈ کے خلاف ٹی ٹوئنٹی سیریز کے لیے قومی اسکواڈ سے باہر کیے جانے پر ان کے والد کا سخت ردعمل سامنے آیا ہے۔

بابر کے والد نے انسٹاگرام پر ایک پوسٹ میں ان کے کارنامے گنواتے ہوئے کہا کہ بیٹے کو آئی سی سی ٹی ٹوئنٹی ٹیم آف دی ایئر میں شامل کیے جانے کے باوجود ٹیم سے نکال دیا گیا۔ انہوں نے سابق کرکٹرز کو بھی سخت پیغام دیتے ہوئے کہا کہ اگر انہیں جواب دیا جائے تو وہ برداشت نہیں کر پائیں گے۔

انہوں نے شائقین کرکٹ کو مشورہ دیا کہ وہ ناقدین کی ماضی کی کارکردگی کو پی سی بی کی ویب سائٹ پر دیکھیں اور خود فیصلہ کریں۔

بابر کے والد نے مزید کہا کہ وہ اپنے بیٹے کے پہلے اور آخری کوچ، مینٹور اور ترجمان ہیں، لہٰذا انہیں بولنے کا پورا حق حاصل ہے۔ انہوں نے امید ظاہر کی کہ بابراعظم نیشنل ٹی ٹوئنٹی اور پی ایس ایل میں بہترین پرفارمنس دے کر مضبوط واپسی کریں گے۔