ایران کی زیرِ زمین جوہری تنصیبات مکمل طور پر فعال ہیں: سربراہ ایٹمی ایجنسی

ایران کی ایٹمی توانائی ایجنسی کے سربراہ محمد اسلامی نے ایک اہم بیان میں اعلان کیا ہے کہ ایران کی زیرِ زمین جوہری تنصیبات مکمل طور پر فعال ہیں اور ایرانی سائنسدان پہلے سے کہیں زیادہ حوصلے اور عزم کے ساتھ کام کر رہے ہیں۔

انہوں نے کہا
“ہماری جوہری تنصیبات نہ صرف محفوظ ہیں بلکہ مکمل آپریشنل بھی ہیں۔ ہمارے سائنسدان قومی خودمختاری اور ترقی کے لیے اپنی ذمہ داریاں پورے جذبے کے ساتھ نبھا رہے ہیں۔”

یہ بیان ایسے وقت میں سامنے آیا ہے جب اسرائیل کی جانب سے ایران کے جوہری پروگرام پر حملوں کی دھمکیاں شدت اختیار کر چکی ہیں۔ اسرائیلی میڈیا میں حالیہ دنوں میں دعویٰ کیا گیا کہ تل ابیب ایران کی ایٹمی تنصیبات کو نشانہ بنانے کے لیے تیار ہے۔

بین الاقوامی مبصرین کا کہنا ہے کہ محمد اسلامی کا بیان ایران کی جانب سے واضح پیغام ہے کہ وہ کسی بھی بیرونی دباؤ یا خطرے کے باوجود اپنا جوہری پروگرام جاری رکھے گا۔