پاک افغان سرحد پر دہشتگردی کا بڑا منصوبہ ناکام، سکیورٹی فورسز نے 5 افغان خوارج گرفتار کر لیے

سکیورٹی فورسز نے پاک افغان سرحد پر دہشتگردی کی بڑی کوشش کو ناکام بناتے ہوئے پانچ مبینہ خودکش حملہ آوروں کو گرفتار کر لیا۔ ذرائع کے مطابق 17 جولائی کی شام 5 بجے خوارج نے دراندازی کی کوشش کی، جس پر فورسز نے بروقت کارروائی کرتے ہوئے پانچ مختلف مقامات پر ناکابندی کی۔

ذرائع کے مطابق شام 6:25 پر خوارج سرحد عبور کر کے پاکستانی حدود میں داخل ہوئے اور عزیز خیل و منڈی خیل کی طرف پیش قدمی کی۔ تاہم سکیورٹی فورسز کی موجودگی دیکھ کر وہ بیسی خیل کی مسجد میں پناہ لینے پر مجبور ہو گئے۔

فورسز نے فوراً مسجد کا محاصرہ کیا اور بہترین حکمت عملی کے تحت خوارج نے ہتھیار ڈال دیے۔ گرفتار افراد کی عمریں 15 سے 18 سال کے درمیان ہیں اور وہ تمام افغان شہری ہیں، جن میں سے تین کے پاس افغان شناختی کارڈز بھی موجود تھے۔

تمام افراد کو مزید تفتیش کے لیے نامعلوم مقام پر منتقل کر دیا گیا ہے۔ سرحدی علاقوں میں ہائی الرٹ جاری کر دیا گیا ہے اور سرچ آپریشن جاری ہے۔

یہ پہلا موقع نہیں کہ اس نوعیت کی دراندازی کی گئی ہو۔ رواں سال کے دوران خوارج کی متعدد کوششیں ناکام بنائی جا چکی ہیں، جن میں اپریل میں 71 اور جولائی میں 30 دہشتگرد ہلاک کیے جا چکے ہیں۔