پاکستان کا پہلا گرین سکوک جاری، ماحولیاتی تحفظ کی طرف اہم قدم

وفاقی وزیر خزانہ محمد اورنگزیب نے پاکستان کا پہلا گرین سکوک بانڈ جاری کرنے کا اعلان کیا ہے، جس کا مقصد ماحولیاتی طور پر پائیدار منصوبوں کی مالی امداد فراہم کرنا ہے۔

پاکستان اسٹاک ایکسچینج سے ویڈیو خطاب میں، جس نے ایک نیا ریکارڈ قائم کیا، وزیر خزانہ نے سرمایہ کاروں کے اعتماد اور معیشت میں بہتری پر اطمینان کا اظہار کیا۔ انہوں نے کہا کہ گرین سکوک ماحولیاتی تبدیلی جیسے بڑے چیلنج کے خلاف ایک سنجیدہ اور فیصلہ کن قدم ہے۔

انہوں نے بتایا کہ واشنگٹن اور لندن میں عالمی سرمایہ کاروں سے ملاقاتوں کے دوران پاکستان کی معاشی صورتحال پر اطمینان کا اظہار کیا گیا، جس کا سہرا مہنگائی پر قابو، زرمبادلہ ذخائر میں بہتری اور معاشی استحکام کو جاتا ہے۔

وزیر خزانہ نے کہا کہ ملائیشیا کے گرین فنانسنگ ماڈل سے سیکھنے کی ضرورت ہے، اور پاکستان بین الاقوامی ماحولیاتی مالی امداد کے حصول کی کوششیں کر رہا ہے۔ انہوں نے یہ بھی اعلان کیا کہ پاکستان کا پہلا پانڈا بانڈ جون 2025 تک چینی مارکیٹ میں جاری کیا جائے گا، جس سے 200 ملین ڈالر حاصل کیے جائیں گے۔

یہ دونوں اقدامات پاکستان کے برآمدات پر مبنی اور پائیدار ترقیاتی ماڈل کی جانب سفر کی عکاسی کرتے ہیں۔