بھارت کے ساتھ کشیدگی کے باعث پاکستان اسٹاک ایکسچینج میں شدید مندی

پیر کو پاکستان اسٹاک ایکسچینج  میں ایک بار پھر شدید مندی دیکھنے میں آئی جب پاکستان اور بھارت کے درمیان بڑھتی ہوئی کشیدگی اور مانیٹری پالیسی کمیٹی  کے اجلاس کے خدشات نے سرمایہ کاروں کو پریشان کر دیا۔

صبح 9:40 بجے کے قریب کے ایس ای 100 انڈیکس میں 890.47 پوائنٹس یا 0.78 فیصد کی کمی ہوئی، جس کے بعد انڈیکس 113,223.46 پر پہنچ گیا۔ یہ کمی گزشتہ ہفتے کی مندی کے تسلسل کا حصہ ہے، جب انڈیکس میں 1,355.41 پوائنٹس کی کمی ریکارڈ کی گئی تھی۔

اس مندی کی وجہ بھارتی فضائی حملے کی افواہیں ہیں، جو بھارتی وزیر اعظم نریندر مودی اور ایئر چیف مارشل وی آر چوہدری کے درمیان 40 منٹ کی ملاقات کے بعد سامنے آئیں۔ یہ ملاقات پہلگام میں حالیہ شدت پسند حملے کے بعد ہوئی ہے۔

مارکیٹ میں غیر یقینی صورتحال کے باعث بڑے شیئرز بھی نیچے چلے گئے۔ ہبکو، پی ایس او، او جی ڈی سی، پی پی ایل، ماری، سوئی ناردرن، میزان بینک، نیشنل بینک اور یونائیٹڈ بینک سمیت کئی اہم شیئرز سرخ نشان میں رہے۔

ٹریڈرز کے مطابق سرمایہ کار فی الحال پالیسی ریٹ اور سیکیورٹی صورتحال میں بہتری کے منتظر ہیں، جس کی وجہ سے مارکیٹ میں کاروبار سست روی کا شکار ہے۔

دوسری جانب، بھارتی اسٹاک مارکیٹس میں تیزی دیکھی گئی۔ نفٹی 50 انڈیکس 0.59 فیصد جبکہ بی ایس ای سینسیکس 0.54 فیصد اوپر گیا۔ بھارتی مارکیٹ میں غیر ملکی سرمایہ کاری میں اضافہ اور عالمی سطح پر تیل کی قیمتوں میں کمی کے باعث مثبت رجحان رہا۔

تاہم تجزیہ کاروں کا کہنا ہے کہ خطے میں جاری کشیدگی بھارت کی اسٹاک مارکیٹ کے مثبت رجحان پر بھی اثر ڈال سکتی ہے۔