پاکستان کی ’’گریٹر اسرائیل‘‘ اور غزہ سے جبری بے دخلی کے منصوبوں کی شدید مذمت

پاکستان نے اسرائیلی حکومت کے حالیہ بیانات کو یکسر مسترد کرتے ہوئے ’’گریٹر اسرائیل‘‘ کے قیام اور غزہ سے فلسطینی عوام کی جبری بے دخلی کے منصوبوں کی شدید مذمت کی ہے۔

دفتر خارجہ کے مطابق یہ اشتعال انگیز اور غیر قانونی عزائم بین الاقوامی قانون، اقوام متحدہ کے چارٹر اور متعلقہ قراردادوں کی کھلی خلاف ورزی ہیں۔ ترجمان نے کہا کہ یہ بیانات قابض طاقت کے اس ارادے کو ظاہر کرتے ہیں کہ وہ اپنے غیر قانونی قبضے کو مزید مضبوط بنانا چاہتی ہے، اور خطے میں دیرپا امن کے لیے عالمی کوششوں کی توہین کر رہی ہے۔

دفتر خارجہ نے عالمی برادری سے فوری اور عملی اقدامات کا مطالبہ کیا تاکہ قابض قوت کو خطے کو مزید غیر مستحکم کرنے اور فلسطینی عوام پر مظالم ڈھانے سے روکا جا سکے۔

پاکستان نے ایک بار پھر فلسطینی عوام کے حقِ خودارادیت اور 1967ء سے قبل کی سرحدوں پر قائم ایک آزاد، خودمختار اور متصل ریاستِ فلسطین کے قیام کی غیر متزلزل حمایت کا اعادہ کیا، جس کا دارالحکومت القدس الشریف ہو۔