ٹرمپ کا انکشاف: قطر پر حملے کا فیصلہ اسرائیلی وزیراعظم نیتن یاہو کا تھا

امریکی صدر ڈونلڈ ٹرمپ نے تہلکہ خیز انکشاف کرتے ہوئے کہا ہے کہ قطر پر حملے کا فیصلہ ان کی حکومت نے نہیں بلکہ اسرائیلی وزیراعظم بنیامین نیتن یاہو نے کیا تھا۔ غیر ملکی میڈیا کے مطابق ٹرمپ نے کہا کہ قطر پر یکطرفہ بمباری نہ امریکا کے مفاد میں ہے اور نہ ہی اسرائیل کے۔ ان کے بقول، امریکا نے اس فیصلے کی کبھی حمایت نہیں کی۔

ٹرمپ نے مزید کہا کہ انہوں نے امریکی وزیرِ خارجہ مارکو روبیو کو ہدایت دی ہے کہ قطر کے ساتھ دفاعی تعاون کا معاہدہ جلد حتمی شکل دی جائے۔ ان کا کہنا تھا کہ “قطر ایک خودمختار ملک اور امریکا کا قریبی اتحادی ہے، جو ہمارے ساتھ مل کر امن قائم کرنے کی کوشش کر رہا ہے۔”

ادھر وائٹ ہاؤس نے یہ دعویٰ کیا تھا کہ امریکا نے دوحہ میں حملے سے قبل قطری حکام کو اطلاع دی تھی، تاہم قطر نے اس دعوے کی سختی سے تردید کی ہے۔ قطری وزارتِ خارجہ کے ترجمان ماجد الانصاری کا کہنا تھا کہ “قطر کو کسی حملے کی پیشگی اطلاع نہیں دی گئی، امریکی حکام کی کال ہمیں دھماکوں کے بعد موصول ہوئی۔”