این ڈی ایم اے کا نیا سیلابی الرٹ، کوٹری پر درمیانے درجے کا سیلاب برقرار

نیشنل ڈیزاسٹر مینجمنٹ اتھارٹی (این ڈی ایم اے) نے ایک نیا الرٹ جاری کیا ہے جس میں راولپنڈی، اسلام آباد اور دریائے سندھ و کابل کے بالائی علاقوں میں بارشوں کی پیشگوئی کی گئی ہے۔ اتھارٹی نے نشیبی علاقوں میں سیلاب کے خطرے سے خبردار کیا ہے۔

ترجمان کے مطابق کوٹری بیراج پر درمیانے درجے کا سیلاب برقرار ہے جہاں پانی کا بہاؤ تقریباً چار لاکھ کیوسک ہے۔ یہ صورتحال ستمبر کے آخر تک برقرار رہنے کا امکان ہے جس سے قریبی علاقے خطرے میں ہیں۔

این ڈی ایم اے نے بتایا کہ گڈو اور سکھر بیراج پر پانی کی سطح میں کمی آ رہی ہے اور صورتحال معمول پر آ رہی ہے۔ دریائے راوی میں گنڈا سنگھ والا کے مقام پر پانی کی سطح میں کمی ریکارڈ کی گئی ہے، تاہم سلیمانکی اور اسلام بیراج پر نچلے درجے کا سیلاب برقرار ہے۔

این ڈی ایم اے کا کہنا ہے کہ نیشنل ایمرجنسی آپریشن سینٹر صورتحال پر چوبیس گھنٹے نظر رکھے ہوئے ہے اور صوبائی و ضلعی انتظامیہ کے ساتھ قریبی رابطہ جاری ہے۔ شہریوں کو ہدایت کی گئی ہے کہ وہ سیلابی علاقوں کا سفر نہ کریں اور کسی بھی صورت میں پانی کو عبور کرنے کی کوشش نہ کریں۔

مزید کہا گیا کہ ریلیف کیمپوں میں موجود افراد کو سرکاری اجازت کے بغیر گھروں کو واپس نہ جانے کی ہدایت دی گئی ہے۔ این ڈی ایم اے نے عوام کو یقین دلایا ہے کہ بروقت اقدامات اور قریبی تعاون کے ذریعے جان و مال کا تحفظ یقینی بنایا جا رہا ہے۔