ڈی جی آئی ایس پی آر کا مظفرآباد میں کشمیری سول سوسائٹی سے خصوصی مکالمہ، محبت، اتحاد اور یکجہتی کے مناظر

پاک فوج کے شعبہ تعلقات عامہ کے ڈائریکٹر جنرل لیفٹیننٹ جنرل احمد شریف چوہدری (ہلالِ امتیاز ملٹری) نے آزاد جموں و کشمیر کے دارالحکومت مظفرآباد کا دورہ کیا۔ اس موقع پر ایک خصوصی نشست کا اہتمام کیا گیا جس میں مقامی سول سوسائٹی کے نمائندگان نے شرکت کی۔

نشست میں سوال و جواب کا سلسلہ جاری رہا، جہاں کشمیری عوام نے پاکستان اور افواجِ پاکستان سے اپنی تاریخی وابستگی کا اظہار کیا۔ حاضرین نے کہا کہ “کشمیر پاکستان کی شہ رگ ہے، تھی اور ہمیشہ رہے گی۔”

شرکاء نے پاک فوج کی بھارتی جارحیت کے خلاف جرات مندانہ اقدامات کو سراہتے ہوئے زبردست خراجِ تحسین پیش کیا اور ڈی جی آئی ایس پی آر کو کشمیری ثقافتی لباس کا تحفہ بھی پیش کیا۔

جلسے کے آخر میں “کشمیر بنے گا پاکستان” اور “پاکستان زندہ باد” کے فلک شگاف نعرے لگائے گئے، جبکہ شرکاء نے پاکستانی اور کشمیری پرچم لہرا کر اپنی یکجہتی کا عملی مظاہرہ کیا۔