پنجاب اسمبلی میں سیاسی تناؤ کا خاتمہ، 26 معطل اپوزیشن ارکان کی بحالی کا فیصلہ

پنجاب اسمبلی میں اپوزیشن اور حکومت کے درمیان جاری کشیدگی ختم ہو گئی ہے۔ اسپیکر پنجاب اسمبلی ملک احمد خان نے اپوزیشن کے خلاف دائر ریفرنسز واپس لینے کا فیصلہ کر لیا ہے۔

ایکسپریس نیوز کے مطابق، اسپیکر کی ہدایات پر اسمبلی حکام نے معطلی ختم کرنے کا ڈرافٹ تیار کر لیا ہے۔ یہ ریفرنسز حکومتی ارکان احمد اقبال، میاں مجتبیٰ شجاع الرحمان اور افتخار احمد چھاچھر کی جانب سے دیے گئے تھے۔

ذرائع کے مطابق، حکومت اور اپوزیشن کے درمیان طے پانے والے معاہدے میں معطل ارکان کی بحالی شامل ہے، جس پر عملدرآمد اسپیکر کی بیرونِ ملک سے واپسی پر کیا جائے گا۔ یہ پیش رفت پنجاب اسمبلی میں سیاسی استحکام کی جانب ایک اہم قدم تصور کی جا رہی ہے۔