وزیراعلیٰ خیبر پختونخوا علی امین گنڈا پور کے وارنٹ گرفتاری جاری

اسلام آباد کی ڈسٹرکٹ اینڈ سیشن کورٹ میں وزیر اعلیٰ خیبر پختونخوا علی امین گنڈا پور کے خلاف شراب اور اسلحہ برآمدگی کیس کی سماعت ہوئی۔ سماعت کے دوران جوڈیشل مجسٹریٹ مبشر حسن چشتی نے علی امین گنڈا پور کے وارنٹ گرفتاری جاری کرتے ہوئے حکم دیا کہ انہیں گرفتار کر کے 17 ستمبر کو عدالت میں پیش کیا جائے۔

ابتدائی طور پر عدالت میں ان کی جانب سے کوئی نمائندہ موجود نہیں تھا، بعد ازاں ان کے وکیل راجا ظہور الحسن پیش ہوئے اور وارنٹ گرفتاری منسوخ کرنے کی استدعا کی۔ وکیل نے کہا کہ میڈیا پر خبر نشر ہو چکی ہے جس سے ان کے موکل کی سبکی ہوئی ہے، تاہم جج نے ریمارکس دیے کہ اگر ملزم کو پیش کریں تو وارنٹ منسوخ کیے جا سکتے ہیں۔

عدالت نے وکیل کی استدعا مسترد کرتے ہوئے وارنٹ گرفتاری برقرار رکھنے کا فیصلہ کیا اور کیس کی مزید سماعت 17 ستمبر تک ملتوی کر دی۔ یہ مقدمہ تھانہ بارہ کہو میں درج کیا گیا تھا، جس میں وزیر اعلیٰ خیبر پختونخوا کو نامزد کیا گیا ہے۔