سیاست
قومی اسمبلی نے نیوی ترمیمی بل منظور کر لیا, سیکیورٹی اور نظم و ضبط کو مضبوط بنانے کا اقدام
قومی اسمبلی نے نیوی کے نظم و ضبط اور قومی سلامتی کو بہتر بنانے کے لیے نیوی ترمیمی بل 2025 منظور کر لیا ہے، جس میں بھرتی، سروس کے دوران رویے اور ریٹائرمنٹ کے بعد کی سرگرمیوں کے لیے سخت قوانین متعارف کرائے گئے ہیں۔
اس بل کے تحت غیر ملکی شہریوں اور دوہری شہریت رکھنے والے افراد کو پاکستان نیوی میں کمیشن دینے پر پابندی عائد کر دی گئی ہے، تاکہ قومی سلامتی کے تقاضے پورے کیے جا سکیں۔
اب 18 سال سے کم عمر افراد نیوی میں کمیشن حاصل نہیں کر سکیں گے، اور ریٹائرڈ افسران پر دو سال تک سیاسی سرگرمیوں میں حصہ لینے پر پابندی عائد ہو گی۔ اس پابندی کی خلاف ورزی کرنے والوں کو دو سال قید کی سزا ہو سکتی ہے۔
بل میں شامل دیگر اہم سزائیں درج ذیل ہیں
خفیہ معلومات افشا کرنے پر 14 سال تک قید
بدعنوانی اور رشوت پر سخت سزائیں
سوشل میڈیا یا ڈیجیٹل پلیٹ فارمز پر نیوی اہلکاروں کی بدنامی پر دو سال تک قید یا جرمانہ
بل کے تحت جنگ یا قومی ہنگامی حالات میں نیوی کے اہلکاروں کو 60 سال کی عمر تک سروس میں رکھا جا سکے گا، اور نیوی کو قومی ترقی، آفات سے نمٹنے اور داخلی استحکام میں کردار ادا کرنے کا اختیار بھی دیا گیا ہے۔
اہم بات یہ ہے کہ بل میں نیوی کے سابقہ تمام احکامات اور قواعد کو عدالتی چیلنج سے تحفظ فراہم کر دیا گیا ہے، جو ادارے کی خود مختاری کو مزید مستحکم کرتا ہے۔
یہ قانون واضح کرتا ہے کہ حکومت ادارہ جاتی نظم و ضبط، قومی رازوں کے تحفظ، اور سیاست سے پاک فوجی نظام کے قیام کے لیے پرعزم ہے۔