عرب ساگر میں ڈپریشن شدت اختیار کر گیا، سندھ کے ساحلی اضلاع الرٹ پر

محکمہ موسمیات نے تصدیق کی ہے کہ عرب ساگر میں موجود ہوا کا کم دباؤ شدت اختیار کر کے ڈپریشن میں بدل گیا ہے۔ یہ نظام اس وقت کراچی سے تقریباً 440 کلومیٹر جنوب میں موجود ہے اور اس کے باعث سندھ کے مختلف ساحلی اضلاع میں بارش، گرج چمک اور تیز ہواؤں کا امکان ہے۔

محکمہ موسمیات کے مطابق تھرپارکر، عمرکوٹ، بدین، ٹھٹھہ، سجاول، ٹنڈو محمد خان اور کراچی میں ہلکی بارش اور بجلی گرنے کے امکانات ہیں۔ سندھ کے ساحلی علاقوں میں 40 سے 50 کلومیٹر فی گھنٹہ کی رفتار سے ہوائیں چلنے اور سمندر میں اونچی لہروں کی پیش گوئی کی گئی ہے۔

ماہی گیروں کو 3 اکتوبر تک گہرے سمندر میں نہ جانے کی ہدایت دی گئی ہے جبکہ بندرگاہ اور ساحلی حکام کو الرٹ رہنے کا حکم دیا گیا ہے۔ حکام کا کہنا ہے کہ یہ نظام فی الحال سمندری طوفان میں تبدیل نہیں ہوا لیکن مسلسل نگرانی جاری ہے۔