عدنان صدیقی کی کنگ چارلس سے یادگار ملاقات

پاکستانی اداکار عدنان صدیقی نے حال ہی میں برطانیہ کے کنگ چارلس سوم سے بکنگھم پیلس میں ملاقات کی۔ یہ خصوصی تقریب عالمی فلم اور ٹی وی انڈسٹری میں نمایاں خدمات پیش کرنے والوں کو خراجِ تحسین پیش کرنے کے لیے منعقد کی گئی تھی، جس میں عدنان صدیقی بھی مدعو تھے۔

عدنان صدیقی نے انسٹاگرام پر اپنے جذبات کا اظہار کرتے ہوئے لکھا کہ ان کی ملاقات “مختصر مگر یادگار” تھی۔ انہوں نے کہا، “کنگ کی شخصیت میں ایک خاص کشش تھی جو ہر کسی کو آرام دہ محسوس کراتی تھی اور ملاقات کے بعد بھی ان کا تاثر باقی رہا۔”

اس تقریب میں ہالی ووڈ کے مشہور اداکار ڈینزل واشنگٹن اور پیڈرو پاسکل بھی موجود تھے، جبکہ ‘گلیڈییٹر 2’ کی پریمیئر تقریب شام کا اہم حصہ تھی۔ فلمی دنیا کی نامور شخصیات کے علاوہ ٹائٹینک اور گلیڈییٹر جیسی مشہور فلموں کے ستارے بھی شریک تھے، اور شاہی بینڈ نے مہمانوں کا پرتپاک استقبال کیا۔