صدر زرداری کا سی ایم ایچ راولپنڈی کا دورہ، بھارتی جارحیت پر دو ٹوک مؤقف

صدرِ پاکستان عاصف علی زرداری نے بدھ کے روز راولپنڈی کے کمبائنڈ ملٹری ہسپتال (سی ایم ایچ) کا دورہ کیا جہاں انہوں نے حالیہ بھارتی حملوں میں زخمی ہونے والے فوجی جوانوں اور شہریوں کی عیادت کی۔

ان کے ہمراہ وفاقی وزیر داخلہ محسن نقوی اور کمانڈر 10 کور بھی موجود تھے۔ صدر زرداری نے پاکستان کے سپاہیوں کی قربانیوں پر فخر کا اظہار کرتے ہوئے کہا کہ پوری قوم اپنے محافظوں کو سلام پیش کرتی ہے۔

انہوں نے بھارتی رویے کو سخت تنقید کا نشانہ بناتے ہوئے اسے ’’انتہا پسندانہ‘‘ اور ’’علاقائی امن کے لیے خطرہ‘‘ قرار دیا۔ انہوں نے کہا کہ مودی حکومت ہندوتوا سوچ کے ذریعے خطے کے امن کو داؤ پر لگا رہی ہے۔

صدر نے کہا، ’’مودی سرکار پاکستان کے خلاف جارحیت کو اپنے سیاسی مقاصد کے لیے استعمال کر رہی ہے۔ ہم پاکستان کی خودمختاری پر کوئی سمجھوتہ نہیں ہونے دیں گے۔‘‘

انہوں نے کہا کہ پوری قوم متحد، پرعزم اور چوکنا ہے اور دشمن کی کسی بھی کارروائی کا منہ توڑ جواب دینے کی بھرپور صلاحیت رکھتی ہے۔

صدر زرداری نے سی ایم ایچ کے ڈاکٹروں اور عملے کا بھی شکریہ ادا کیا جنہوں نے زخمیوں کی دن رات دیکھ بھال کی۔