شاہ محمود قریشی سینے میں درد کے بعد اسپتال منتقل، حالت مستحکم قرار

پاکستان تحریکِ انصاف کے سینئر رہنما شاہ محمود قریشی کو کوٹ لکھپت جیل لاہور سے پنجاب انسٹیٹیوٹ آف کارڈیالوجی  منتقل کر دیا گیا ہے۔

ذرائع کے مطابق شاہ محمود قریشی کو جیل میں سینے میں درد کی شکایت ہوئی، جس کے بعد انہیں جیل کے اسپتال میں ابتدائی طبی امداد دی گئی، لیکن ڈاکٹروں نے مزید تشخیص کے لیے انہیں  منتقل کرنے کی سفارش کی۔

اسپتال ذرائع کے مطابق شاہ محمود قریشی کی ابتدائی میڈیکل رپورٹس میں ان کی حالت مستحکم بتائی گئی ہے، تاہم مکمل تشخیص کے لیے مزید ٹیسٹ جاری ہیں۔

منتقلی کے دوران سیکیورٹی کے سخت انتظامات کیے گئے۔ جیل حکام نے ان کے اہل خانہ کو صورتحال سے آگاہ کر دیا ہے۔

پی ٹی آئی کے کارکنان اور رہنما ان کی صحت سے متعلق تازہ ترین خبروں پر گہری نظر رکھے ہوئے ہیں۔