خیبر پختونخوا میں سیلاب سے متاثرہ اسکولوں کی بحالی کیلئے 2 ارب روپے درکار

محکمہ تعلیم خیبر پختونخوا نے حالیہ سیلاب سے تعلیمی ڈھانچے کو پہنچنے والے نقصانات کی حتمی رپورٹ چیف سیکرٹری آفس میں جمع کرا دی ہے، جس نے صورتحال کی سنگینی کو واضح کر دیا ہے۔

رپورٹ کے مطابق صوبے کے 14 اضلاع میں 370 اسکول متاثر ہوئے، جن میں سے 58 مکمل تباہ جبکہ 312 جزوی طور پر متاثر ہوئے ہیں۔

بحالی اور تعمیر نو کے لیے 2 ارب روپے سے زائد فنڈز درکار ہوں گے۔ رپورٹ میں بتایا گیا کہ ایک پرائمری اسکول کی بحالی پر 3 کروڑ 50 لاکھ، مڈل اسکول پر 2 کروڑ 60 لاکھ، ہائی اسکول پر 7 کروڑ 50 لاکھ اور ہائر سیکنڈری اسکول کی بحالی پر 6 کروڑ 50 لاکھ روپے لاگت آئے گی۔

دستاویز میں متاثرہ علاقوں میں پری فیبریکیٹڈ پرائمری اسکولز قائم کرنے کی سفارش کی گئی ہے تاکہ فوری بنیادوں پر تعلیم فراہم کی جا سکے۔ حکومت نے سیلاب زدہ علاقوں میں تعلیمی بحران سے نمٹنے کے لیے 5 ارب روپے کا ایجوکیشن ایمرجنسی فنڈ مختص کیا ہے اور یونیسف سے عارضی کلاسز کے لیے خیمے فراہم کرنے کی اپیل بھی کی گئی ہے۔

رپورٹ میں زور دیا گیا ہے کہ زیادہ انرولمنٹ والے اور قریبی اسکول نہ رکھنے والے علاقوں میں فوری مرمت اور بحالی کو اولین ترجیح دی جائے۔