پنجاب کے تعلیمی ادارے کل سے دوبارہ کھلیں گے، لاہور اور ملتان مستثنیٰ

پنجاب میں سموگ کی شدت میں کمی کے بعد حکومت نے تعلیمی ادارے دوبارہ کھولنے کا فیصلہ کیا ہے۔ یہ فیصلہ لاہور اور ملتان ڈویژن کے علاوہ باقی تمام اضلاع کے لیے کیا گیا ہے، اور اسکولز کل (منگل) سے کھل جائیں گے۔

سینئر وزیر مریم اورنگزیب نے کہا، “سموگ کی صورتحال پچھلے چند دنوں میں بہتر ہوئی ہے، اور ہم نے عوام کی صحت کے تحفظ کے لیے سخت فیصلے کیے ہیں۔”

ماحولیاتی تحفظ ایجنسی کی جانب سے جاری کردہ نوٹیفکیشن کے مطابق اسکول صبح 8:45 بجے کھلیں گے اور آؤٹ ڈور سرگرمیوں پر پابندی ہوگی۔ تمام طلباء، اساتذہ اور اسٹاف کے لیے ماسک کا استعمال لازمی ہوگا۔

حکومت نے اسکول انتظامیہ کو ہدایت کی ہے کہ احتیاطی تدابیر پر سختی سے عمل درآمد کیا جائے تاکہ طلباء کے لیے محفوظ تعلیمی ماحول فراہم کیا جا سکے۔