ٹرمپ کا ایردوان کو وائٹ ہاؤس میں “بہترین دوست” قرار، اہم دفاعی و تجارتی معاہدوں کا اعلان

ترک صدر رجب طیب ایردوان وائٹ ہاؤس پہنچے جہاں ان کی امریکی صدر ڈونلڈ ٹرمپ سے اہم ملاقات ہوئی۔ دونوں رہنماؤں نے غزہ، شام، یوکرین، دفاعی تعاون اور بڑے تجارتی معاہدوں پر بات چیت کی۔

ٹرمپ نے ایردوان کو اپنا “بہترین دوست” اور “یورپ و دنیا کا باعزت رہنما” قرار دیا۔ غزہ پر بات کرتے ہوئے انہوں نے جنگ بندی کی امید ظاہر کی اور شام میں استحکام لانے میں ایردوان کے کردار کو سراہا۔ ٹرمپ نے یہ بھی یقین دلایا کہ امریکہ مغربی کنارے کو اسرائیل میں ضم نہیں ہونے دے گا۔

یوکرین کے معاملے پر ٹرمپ نے روسی جارحیت کی مذمت کی اور ترکیہ پر روسی تیل کی خرید روکنے پر زور دیا۔ دفاعی معاہدوں میں ایف-16 اور ایف-35 جیٹ طیاروں پر بات ہوئی، اور ٹرمپ نے ترکیہ پر عائد پابندیاں ختم کرنے کا عندیہ دیا۔

ملاقات کے دوران بڑے تجارتی معاہدے بھی طے پائے، جن میں سول نیوکلیئر توانائی معاہدہ، بوئنگ طیاروں کی 200 سے زائد خریداری، اور 20 سالہ 43 ارب ڈالر مالیت کا ایل این جی معاہدہ شامل ہے۔

ماہرین کا کہنا ہے کہ ایردوان کا یہ دورہ امریکہ-ترکی تعلقات میں نئے موڑ کا پیش خیمہ ثابت ہو سکتا ہے۔