بلاول بھٹو کا جوہری اثاثوں کے تحفظ اور آزاد خارجہ پالیسی پر دوٹوک موقف

پاکستان پیپلز پارٹی کے چیئرمین بلاول بھٹو زرداری نے میڈیا سے گفتگو کرتے ہوئے پاکستان کی آزاد خارجہ پالیسی پر زور دیا اور کہا کہ دنیا کے موجودہ جغرافیائی حالات کے تناظر میں پاکستان اپنے موقف پر قائم ہے۔

بلاول بھٹو نے پاکستان کے جوہری اثاثوں اور میزائل ٹیکنالوجی کو ذوالفقار علی بھٹو اور بے نظیر بھٹو کا ورثہ قرار دیتے ہوئے واضح کیا کہ پیپلز پارٹی کبھی ان اثاثوں یا جوہری پروگرام پر سمجھوتہ نہیں کرے گی۔

کابینہ میں شامل ہونے کے سوال پر بلاول نے صاف انکار کرتے ہوئے کہا کہ پیپلز پارٹی کابینہ کا حصہ نہیں بنے گی۔ وزیر اعظم شہباز شریف کی مدت مکمل کرنے کی صلاحیت پر بلاول نے اعتماد کا اظہار کرتے ہوئے کہا، “انشاءاللہ!”

عدلیہ کے حوالے سے بات کرتے ہوئے بلاول نے کہا کہ جب کوئی جج عہدہ سنبھالتا ہے تو اسے اپنے ساتھیوں کو سہولت فراہم کرنی چاہیے، مشکلات پیدا نہیں کرنی چاہئیں۔ انہوں نے یہ بھی کہا کہ چھبیسویں آئینی ترمیم کو ختم کرنے کا اختیار صرف پارلیمنٹ کے پاس ہے، کسی اور ادارے کو نہیں۔