تجارت
کراچی ایئرپورٹ سے 324 بھکاری گرفتار، پاسپورٹ بلیک لسٹ، پانچ سال کی سفری پابندی عائد
ایف آئی اے نے کراچی کے جناح انٹرنیشنل ایئرپورٹ پر انسانی اسمگلنگ اور بھیک مانگنے کے لیے بیرون ملک جانے کی کوشش کرنے والوں کے خلاف بڑی کارروائی کی ہے۔ اس دوران 324 افراد کو گرفتار کیا گیا جن میں 119 خواتین اور دو انسانی اسمگلر شامل ہیں۔ رپورٹ کے مطابق، 204 افراد کو 2024 میں بیرون ملک روانگی سے قبل پکڑا گیا، جب کہ 269 افراد کو بیرون ممالک سے ڈیپورٹ ہونے کے بعد گرفتار کیا گیا۔ ایف آئی اے کے مطابق یہ افراد عمرہ ویزوں کا استعمال کرتے ہوئے غیر قانونی طور پر بھیک مانگنے کے لیے جا رہے تھے۔
ایف آئی اے نے تمام گرفتار شدہ افراد کے پاسپورٹس بلیک لسٹ کر دیے ہیں اور ان پر پانچ سال کی سفری پابندی عائد کر دی گئی ہے۔ اس کے علاوہ ان کے قومی شناختی کارڈز اور بینک اکاؤنٹس بھی بلاک کر دیے گئے ہیں۔ ادارے کا کہنا ہے کہ یہ قدم پاکستان کی عالمی ساکھ کو بہتر بنانے اور انسانی اسمگلنگ جیسے سنگین جرائم کو روکنے کے لیے اُٹھایا گیا ہے۔ ایف آئی اے نے مزید انکشاف کیا کہ 26 مشتبہ ایجنٹس میں سے صرف دو کو گرفتار کیا گیا ہے، جب کہ باقی کے خلاف کارروائیاں جاری ہیں۔