ٹیکنالوجی
مریخ پر کئی بار زندگی کے لیے سازگار حالات موجود رہے، ناسا کی نئی تحقیق
ناسا کے مریخ روور “پرسویئرنس” نے مریخ پر پانی کے کئی ادوار کے شواہد فراہم کیے ہیں۔ ماہرین کے مطابق مریخ کے جیروزو کریٹر میں پانی نے آتش فشانی چٹانوں کو بدل کر نمکیات اور مٹی کے معدنیات میں تبدیل کیا۔ اس عمل نے وہاں تین الگ الگ ادوار میں سیال سرگرمی کو ظاہر کیا۔
پہلا دور تیزابی پانی پر مشتمل تھا جو زندگی کے لیے سخت ترین ماحول سمجھا جاتا ہے۔ دوسرا دور معتدل اور نسبتاً موزوں ماحول فراہم کرتا تھا جبکہ تیسرا دور ٹھنڈے اور الکلائن حالات پر مشتمل تھا جو زندگی کے لیے سب سے زیادہ سازگار مانا جاتا ہے۔
رائس یونیورسٹی کی محقق ایلیانور مورلینڈ کے مطابق یہ نتائج واضح کرتے ہیں کہ مریخ پر کئی بار ایسا ماحول بنا جہاں زندگی ممکن ہو سکتی تھی۔ ناسا کا یہ انکشاف مریخ پر زندگی کی تلاش میں ایک اہم پیش رفت قرار دیا جا رہا ہے۔