فن و ثقافت
حمیرا اصغر کے موبائل کی واٹس ایپ ڈی پی موت کے چار ماہ بعد بدلی، کیس میں نیا موڑ
پاکستان کی معروف اداکارہ حمیرا اصغر کے کیس میں سنسنی خیز انکشافات سامنے آئے ہیں۔ اداکارہ کے اسٹائلسٹ دانش مقصود نے پولیس کو بتایا ہے کہ حمیرا کی موت کے تقریباً چار ماہ بعد ان کے واٹس ایپ اکاؤنٹ پر ڈی پی تبدیل ہوئی۔
دانش کے مطابق، اداکارہ کا موبائل 5 فروری 2025 تک فعال دکھائی دے رہا تھا، اور اسی دن ان کے واٹس ایپ پر ڈی پی ہٹ گئی جبکہ لاسٹ سین بھی غائب ہوگیا۔ یاد رہے کہ پولیس کی ابتدائی تحقیقات میں لاسٹ سین کی آخری تاریخ 7 اکتوبر 2024 ریکارڈ ہوئی تھی۔
دانش مقصود نے دعویٰ کیا کہ اس نے 5 فروری کو حمیرا کی گمشدگی سے متعلق سوشل میڈیا پر پوسٹ کی، جس کے فوراً بعد واٹس ایپ ڈی پی ہٹا دی گئی اور لاسٹ سین بھی نظر آنا بند ہوگیا۔ ان کا کہنا ہے کہ یہ سب کچھ موبائل استعمال کیے بغیر ممکن نہیں۔
ڈی آئی جی ساؤتھ اسد رضا نے اس معاملے کی تصدیق کرتے ہوئے کہا ہے کہ دانش مقصود سے مکمل معلومات حاصل کر لی گئی ہیں اور اس نئے پہلو پر باقاعدہ تفتیش کا آغاز کر دیا گیا ہے تاکہ اصل حقائق سامنے لائے جا سکیں۔