سیاست
بلاول بھٹو کا مطالبہ: سیلاب متاثرین کی امداد بی آئی ایس پی کے ذریعے دی جائے
کراچی میں وزیراعلیٰ ہاؤس میں پریس کانفرنس کرتے ہوئے چیئرمین پیپلز پارٹی بلاول بھٹو زرداری نے کہا ہے کہ وفاقی حکومت کو فوری طور پر سیلاب متاثرین کی امداد بے نظیر انکم سپورٹ پروگرام کے ذریعے کرنی چاہیے۔ انہوں نے یاد دلایا کہ پچھلے سیلاب اور کووڈ کے دوران بھی بی آئی ایس پی کے ذریعے عوام تک ریلیف پہنچایا گیا تھا۔
بلاول بھٹو نے کہا کہ سندھ حکومت نے بے نظیر ہاری کارڈ کے ذریعے چھوٹے کسانوں کی مدد کا فیصلہ کیا ہے، تاکہ وہ ڈی اے پی اور یوریا کی خریداری کر سکیں۔ ان کے مطابق اگر کسانوں کو سہولت دی جائے تو نہ صرف گندم کی درآمد روکی جا سکتی ہے بلکہ پاکستان اپنی اجناس ایکسپورٹ بھی کر سکتا ہے۔
انہوں نے وفاقی حکومت سے مطالبہ کیا کہ زرعی ایمرجنسی کے تحت آئی ایم ایف سے بات کی جائے اور کسانوں کو ٹیکس کی مد میں ریلیف فراہم کیا جائے۔ بلاول بھٹو نے کہا کہ جنوبی پنجاب سمیت پنجاب بھر میں سیلاب متاثرہ کسانوں کو فوری مدد کی ضرورت ہے، اگر بی آئی ایس پی کے ذریعے امداد دی جائے تو شفافیت اور اعتماد قائم ہو گا۔