سیاست
کوئٹہ ریلوے اسٹیشن پر خودکش دھماکہ، 24 افراد جاں بحق، حکام کی جانب سے مذمت
کوئٹہ ریلوے اسٹیشن پر خودکش دھماکے میں 24 افراد جان کی بازی ہار گئے۔ کمشنر کوئٹہ حمزہ شفقات کے مطابق یہ حملہ سیکورٹی فورسز کو نشانہ بناتے ہوئے کیا گیا۔ ایس ایس پی آپریشن کوئٹہ محمد بلوچ کے مطابق اس وقت پلیٹ فارم پر 100 سے زائد افراد موجود تھے، اور دھماکے کے وقت جعفر ایکسپریس کے مسافر پلیٹ فارم پر روانگی کے منتظر تھے۔
اس واقعے کے بعد سول اسپتال میں ایمرجنسی نافذ کردی گئی جبکہ صوبائی حکومت نے واقعے کی رپورٹ طلب کرلی۔ وزیراعلیٰ بلوچستان سرفراز بگٹی نے دہشتگردی کی اس بزدلانہ کارروائی کی مذمت کرتے ہوئے دہشتگردوں کا قلع قمع کرنے کے عزم کا اعادہ کیا۔ وزیراعظم شہباز شریف نے بھی دھماکے کی مذمت کرتے ہوئے زخمیوں کو ترجیحی بنیادوں پر طبی امداد فراہم کرنے کی ہدایت کی۔